YouTube-ის პოდკასტის „The Edward Show“-ს 852-ე ეპიზოდი ორ, ერთი შეხედვით განსხვავებულ, თუმცა ღრმად დაკავშირებულ ამბავს გვიყვება. ორივე ისტორია ცხადყოფს, რომ თანამედროვე SEO და AI-ზე დაფუძნებული ძიების ეპოქაში, ტექნიკური „ჰაკები“ ადგილს უთმობს მარკეტინგის ფუნდამენტურ პრინციპებს: ბრენდის შენებას, რეპუტაციას და რეალურ ღირებულებას.
სტატია აანალიზებს პოდკასტის ორ მთავარ ქეისს: პირველი, თუ რატომ დახურა მეწარმემ თავისი „გენერაციული ძიების ოპტიმიზაციის“ (GEO) სტარტაპი და მეორე, როგორ მიაღწია სანტექნიკის ლოკალურმა ბიზნესმა თვეში $3.4 მილიონიან გაყიდვებს.
GEO-ს ილუზია და ბრენდის რეალობა
პოდკასტი იწყება ბენჯამინ ჰოის (Benjamin Hoy) ისტორიით, რომელმაც დახურა საკუთარი GEO კომპანია “Lauraite”. ეს პლატფორმა მიზნად ისახავდა ბიზნესებს AI მოდელებში (როგორიცაა ChatGPT და Perplexity) ხილვადობის გაზრდაში დახმარებოდა.
ბენჯამინის მთავარი დასკვნა: მან აღმოაჩინა, რომ არ არსებობს ცალკე მდგომი “GEO სტრატეგია”, რომელიც ბრენდის შენებისგან დამოუკიდებლად მუშაობს.
AI მოდელების პასუხებში მოსახვედრად საჭიროა ზუსტად იგივე კომპონენტები, რაც ტრადიციული SEO-ს, PR-ისა და ბრენდინგისთვის:
- ხარისხიანი კონტენტი
- ავტორიტეტულ გამოცემებში მოხსენიება
- ძლიერი რეპუტაცია
- ნამდვილი ექსპერტიზა
AI მოდელები უფრო მეტად ამ ფუნდამენტურ სიგნალებზე არიან დამოკიდებულნი, ვიდრე რაიმე ტექნიკურ ხრიკზე. როგორც პოდკასტის წამყვანი და თავად ბენჯამინი ასკვნიან: „არ გჭირდება განყენებული GEO სერვისი, გჭირდება კარგი მარკეტინგი“.
ეს მოსაზრება ემთხვევა ინდუსტრიის ლეგენდის, გლენ ოლსოპის (Viper Chill) პოზიციას, რომ SEO რჩება როგორც საძიებო სისტემების (AEO), ასევე გენერაციული ძიების (GEO) ოპტიმიზაციის ფუნდამენტად.
$3.4 მილიონიანი ლოკალური SEO-ს სტრატეგია
მეორე ისტორია ეხება ისაიკ ზიმერმანს (Isaique Zimmerman) და მის სანტექნიკის ბიზნესს, რომელმაც ოქტომბერში $3.4 მილიონის რეკორდული გაყიდვები დააფიქსირა. ეს კომპანია Google-ში 1600-ზე მეტ ლოკალურ საკვანძო სიტყვაზე პირველ პოზიციებზეა.
მათი წარმატება არა იმდენად SEO-ს იზოლირებულ ტაქტიკებს, არამედ ინტეგრირებულ, ბრენდზე ორიენტირებულ მარკეტინგს ეფუძნება.
სტრატეგია 1: ჰიპერ-ლოკალური დომინაცია (Offline-დან Online-ამდე)
იმის ნაცვლად, რომ ბიუჯეტი მთელ ქალაქზე გაეშალათ, მათ კონკრეტული უბნები აირჩიეს ყველაზე მაღალი მოთხოვნით:
- 80,000 პირდაპირი საფოსტო გზავნილი თვეში.
- ბილბორდები კონცენტრირებული იმავე საფოსტო კოდებში.
- ადგილობრივი ივენთები და საზოგადოებრივი ჩართულობა.
- ბრენდირებული სატვირთოები, რომლებიც მუდმივად მოძრაობენ ამ უბნებში.
შედეგი: ბრენდმა მარტივად მიაღწია „Top-of-mind awareness“ (მაღალ ცნობადობას). როდესაც ადგილობრივ მცხოვრებელს სანტექნიკის პრობლემა უჩნდება, პირველი, რაც თავში მოსდის, მათი ბრენდია. ამის შემდეგ მომხმარებელი Google-ში პირდაპირ კომპანიის სახელს ეძებს (Branded Search). ეს კი Google-ისთვის უძლიერესი სიგნალია, რაც ავტომატურად აძლიერებს მათ SEO პოზიციებს და ზრდის ნდობას. თავის მხრივ მოწინავე პოზიციები დამატებით ლიდებს აძლევს ბიზნესს.
სტრატეგია 2: Google-ის შეფასებების გენერირება (ფოტოების წახალისება)
კომპანიას 4000-ზე მეტი Google-ის შეფასება აქვს, რაც სასიცოცხლოდ მნიშვნელოვანია როგორც ფასიანი რეკლამებისთვის (PPC), ასევე ორგანული ძიებისთვის.
როგორ იღებენ რევიუებს:
- ავტომატიზაცია: სამუშაოს დასრულების შემდეგ მომხმარებელი ავტომატურად იღებს შეფასების დატოვების მოთხოვნას.
- ტექნიკოსების მოტივაცია: ტექნიკოსები იღებენ ბონუსებს 5-ვარსკვლავიანი შეფასებისთვის და კიდევ უფრო დიდ ბონუსს, თუ მომხმარებელი შეფასებას ფოტოსაც დაურთავდა.
რატომ არის მნიშვნელოვანი? ეს გენიალური SEO ტაქტიკაა. Google Maps-ში ფოტო-შეფასებები უფრო მაღლა ჩანს, რადგან სისტემა მათ უფრო სანდოდ და რელევანტურად მიიჩნევს. შედეგად ლიდების მიღების ალბათობა მკვეთრად იზრდება.
სტრატეგია 3: ბრენდის გაადამიანურება (J Blandon)
კომპანიამ რებრენდინგი განახორციელა. მათ შექმნეს პერსონაჟი „Jay“ (ჯეი).
ამან ბრენდს მისცა „სახე“ – პროფესიონალური, თავდაჯერებული და ამავდროულად მეგობრული. მომხმარებლები ვეღარ ხედავდნენ უსახო კომპანიას; ისინი კავშირს ამყარებდნენ პიროვნებასთან. როგორც პოდკასტის წამყვანი ამბობს: „ადამიანებს სურთ, ადამიანებისგან იყიდონ“.
მოდით შევაჯამოთ…
პოდკასტის ორივე ისტორია ერთ დასკვნამდე მიდის:
ბენჯამინ ჰოიმ თეორიულად დაასკვნა, რომ GEO (და თანამედროვე SEO) ბრენდის შენებაზე დგას. ისაიკ ზიმერმანმა კი პრაქტიკულად აჩვენა, თუ როგორ ითარგმნება ეს ფუნდამენტური, ბრენდზე ორიენტირებული მარკეტინგი თვეში $3.4 მილიონიან შემოსავალში.
SEO სპეციალისტებისთვის მთავარი გზავნილია, რომ ალგორითმების მოკლევადიანი ხრიკების ძიების ნაცვლად, ფოკუსი ღირებულებაზე დაფუძნებულ მარკეტინგზე გადავიდეს. უფრო მარტივად, რომ ვთქვათ უმჯობესია სპეკულაციას თავი დავანებოთ და მომხმარებლისთვის სარგებლის მიცემაზე დავიწყოთ ფიქრი.
