რატომ გვჭირდება B2B SEO ოპტიმიზაცია?

ივნისი 14, 2022

იცოდით? B2B მარკეტერების 61% პროცენტი აცხადებს, რომ SEO ოპტიმიზაციით ორგანული ტრაფიკის ზრდა ნომერ პირველი პრიორიტეტია. როგორც აღნიშნავენ, ისინი წლიდან წლამდე მეტ ბიუჯეტს გამოყოფენ საძიებო სისტემების ოპტიმიზაციისთვის.

დღეს, როგორც არასდროს, ბიზნესები აქტიურად ცდილობენ გუგლის დახმარებით ბრენდის ირგვლივ მუდმივად მზარდი აუდიტორია შემოიკრიბონ. რატომ? – ეს ძალისხმევა გაზრდილი გაყიდვებით, მაღალი ბრენდის ცნობადობითა და კონკურენტული უპირატესობის მოპოვებით ჯილდოვდება.

კორპორაციული შესყიდვების დროს ორგანიზაციების 77% არც კი ესაუბრება გამყიდველს მანამ, სანამ პირადად არ ჩაატარებს კვლევას. რის საფუძველზე ატარებენ კვლევას? – ინფორმაციის წყაროს უდიდეს ნაწილს კომპანიის ვებგვერდზე განთავსებული მასალა წარმოადგენს.

წარმოიდგინეთ, ხართ სამშენებლო კომპანიის წარმომადგენელი და გინდათ, რომ მშენებლობისთვის ეფექტური ექსკავატორები შეიძინოთ. როგორ მიიღებთ გადაწყვეტილებას? – დიდი ალბათობით გუგლში დაიწყებთ ინფორმაციის მოძიებას, შეამოწმებთ საძიებო შედეგებში პირველ პოზიციაზე მყოფ ვებგვერდს, შემდეგ მეორეს, მესამეს, მეოთხეს და კონკრეტულ საკვანძო სიტყვაზე ძიებას შევწყვეტთ. შემდეგ სხვა სიტყვას ჩაწერთ გუგლში იქნებ თქვენს განზრახვაზე მორგებული შედეგი გიჩვენოთ. ისევ ესტუმრებით მოწინავე გვერდებს და ა.შ. გუგლის გარდა, შეგიძლიათ მეგობრებსაც ჰკითხოთ რჩევა, მაგრამ ვინაიდან ბევრი დრო არ გაქვთ, შესაბამისად გუგლში ინფორმაციის მოძიება ისევ პრიორიტეტულია.

შესყიდვით დაინტერესებული მენეჯერებიც გადაწყვეტილების მიღებას ხშირად საძიებო სისტემაში ინფორმაციის მიღებით იწყებენ. საინტერესოა, რა უნდა გაითვალისწინოს გამყიდველის მხარემ? – საკუთარი ბრენდი გუგლში მიმზიდველი ფორმით ყველაზე თვალსაჩინო ადგილას უნდა განათავსოს.

სარჩევი

რა არის B2B SEO ოპტიმიზაცია

ეს არის ვებგვერდის საძიებო სისტემებში ოპტიმიზაცია კორპორატიული კლიენტებისთვის. B2C SEO-ს მსგავსად, ამ შემთხვევაშიც ვებგვერდის აწყობისას საძიებო სისტემების რეკომენდაციებს ითვალისწინებენ, უბრალოდ ფოკუსირებას მომხმარებლის განსხვავებული ძიების განზრახვაზე აკეთებენ. თუ B2C-ს შემთხვევაში მნიშვნელოვანი ფიზიკური პირებია, B2B ოპტიმიზაციისას მთავარ სამიზნეს კომპანიები წარმოადგენენ. ამ დროს გამყიდველი მხარე უნდა დაფიქრდეს რას და რატომ ეძებენ კომპანიის მენეჯერები საძიებო ველში.

B2B SEO ოპტიმიზაციის სარგებელი

B2B საძიებო სისტემების ოპტიმიზაციის სარგებელი ბიზნესებისთვის

ადამიანების მსგავსად, ორგანიზაციებიც კონკრეტული მიზნისთვის იყენებენ საძიებო სისტემას. მათი ძიების პროცესი კი გაცილებით რაციონალურია. ამიტომ, გამყიდველ მხარეს შეუძლია ძიების განზრახვის დაკმაყოფილებაზე გათვლილი ნაბიჯებით ეფექტურად უპასუხოს მომხმარებლის მხარეს, სანაცვლოდ კი დიდი სარგებელს მიიღოს.

გაყიდვების ზრდა

ყველაზე მთავარი მიზეზი, რის გამოც საძიებო სისტემის მოწინავე პოზიციებზე უნდა მოხვდეთ, გრძელვადიან პერსპექტივაში სტაბილურად მზარდი გაყიდვებია. SERP-ში (საძიებო სისტემის შედეგების გვერდი) პირველ პოზიციაზე მყოფი ვებგვერდი ტრაფიკის დაახლოებით 30%-ს იღებს. თავის მხრივ, ვიზიტორები პოტენციურ მყიდველებს წარმოადგენენ.

ონლაინ გაყიდვების წარმატება მეტწილად ვებგვერდზე სწორად შედგენილ შესყიდვის პროცესზეა დამოკიდებულია, რამდენად ინტუიტიურია სანავიგაიცო პანელი, გასათვალისწინებელია, გადახდის ზედმეტად ბევრი დონე ხომ არ გვაქვს და ა.შ. თუმცა ამ ეტაპამდე მისასვლელად საჭიროა მთელი რიგი სამუშაოების გავლა, რომლებიც ადამიანებს ვებგვერდის ვიზიტორებად აქცევს.

ამ პროცესის წარმატებულად დაგვირგვინებისთვის კი SEO ოპტიმიზაცია ერთ-ერთი ყველაზე ეფექტური საშუალებაა.

ბრენდის ცნობადობის ზრდა

გუგლი კომპანიებს საზოგადოების წინაშე ძალიან დაბალი დანახარჯებით თვითწარდგენის შესაძლებლობას აძლევს.

რეალურად, ფართო მასებისთვის ინფორმაციის მისაწოდებლად საერთოდ არ არის დიდი რესურსების ხარჯვა საჭირო, გაცილებით მნიშვნელოვანია ყველაზე ეფექტურად სამიზნე მომხმარებელს წარვუდგინოთ ბრენდი.

მოწინავე პოზიციის დაკავება ბიზნესს აძლევს შესაძლებლობას გრძელვადიან პერსპექტივაში გააცნოს თავი მომხმარებლებს და ამით გაზარდოს ბრენდის ცნობადობა. რეპუტაცია კი გაზრდილ კონვერტაციებში (ვიზიტორების მყიდველებად ქცევის პროცესი) აისახება.

ხელმისაწვდომობა და ხილვადობა

მხოლოდ მიმზიდველი დიზაინი და საინტერესო ტექსტები ვიზიტორებს თქვენს ერთგულ მომხმარებლებად ვერ გადააქცევს. ამისათვის კიდევ ბევრი სამუშაოა ჩასატარებელი, მაგ: ვებგვერდის გამართულად ფუნქციონირებისთვის სწორი ტექნიკური SEO ოპტიმიზაცია, საძიებო ბაზარზე სწორი პოზიციონირებისთვის საძიებო სიტყვების ანალიზი, ხოლო მომხმარებლების დაინტერესებისთვის კი მიმზიდველი კონტენტია საჭირო.

გასათვალისწინებელია, რომ საძიებო სისტემაში ხილვადობა მომხმარებლის განზრახვის შესაბამისი უნდა იყოს. მაგ: ავტომობილების ვებგვერდი „სარეცხი მანქანის“ საკვანძო სიტყვაზე არ უნდა გვხვდებოდეს პირველ პოზიციაზე. თავის მხრივ, ვებგვერდის რელევანტურობას საკვანძო სიტყვების კვლევა და მათი კონტენტში იმპლემენტირება განაპირობებს.

ერთგული აუდიტორიის შემოკრება

საძიებო სისტემის დახმარებით ვეებგვერდი ერთგულ აუდიტორიას იკრებს

კომპანიებისთვის დიდი ფუფუნებაა, როდესაც ჰყავთ ადამიანები, რომლებიც მათ სიტყვას ენდობიან და ყურადღებით უსმენენ. ხშირად, სწორედ ამ ტიპის აუდიტორია აგენერირებს გაყიდვების 50%-ს. SEO კი ერთგული ადამიანების შემოკრების ეფექტურ მეთოდს გთავაზობთ. შეგიძლიათ ბლოგის დახმარებით მოუყვეთ მათ კომპანიისთვის რელევანტური თემების შესახებ, შესთავაზოთ ხარისხიანი კონტენტი, გაიგოთ მათი აზრი კომენტარების მეშვეობით და ა.შ. შედეგად, მიიღებთ მუდმივად მზარდ ორგანულ ტრაფიკს, რომლიც მომავალში თქვენი ბრენდის ერთგულ აუდიტორიად გადაიქცევა.

ის B2B კომპანიები, რომლებიც საზოგადოებასთან კომუნიკაციისთვის ბლოგს იყენებენ 67%-ით მეტს ყიდიან კონკურენტებთან შედარებით.  ამის ნათელი მაგალითი აგრო ტექნიკის მწარმოებელი კომპანია „John Deere“-ის ბლოგია, რომელშიც ის არა მხოლოდ საკუთარი პროდუქტების, არამედ ზოგადად აგრარული ბაზრისა და მომხმარებლისთვის საინტერესო თემების შესახებ წერს.

კონტენტის დახმარებით მყიდველები ამოწმებენ გამყიდველი მხარის კომპეტენტურობასა და სანდოობას. საჭიროების დაკმაყოფილების შემთხვევაში ისინიც ბრენდის აუდიტორიის ერთგულ წევრებად გადაიქცევიან.

ბევრი აუთვისებელი საძიებო სეგმენტი

ქართულ საძიებო ბაზარზე, რომელზეც ჯერჯერობით დაბალი კონკურენციაა, მრავალი შესაძლებლობა იშლება B2B კომპანიებისთვის. ეს ნიშნავს, რომ თუ დღეს დაიკავებთ სამიზნე საკვანძო სიტყვებს, ამჟამად ტრაფიკის უდიდეს ნაწილს, საშუალოდ 30%-ზე მეტს, თქვენ მიიღებთ.

წლიდან წლამდე კონკურენცია საძიებო ბაზარზე მკვეთრად იზრდება, მენეჯერები იაზრებენ,  თუ რა არის SEO ოპტიმიზაცია. შესაბამისად იციან, რომ ოპტიმიზაციის პროცესის შედეგად წარმატებულ შედეგებს უზრუნველყოფენ. შესაბამისად, თუ თქვენ დღეიდან შეუდგებით ვებგვერდის გუგლის რეკომენდაციების მიხედვით მოწყობას, მომავალში კონკურენციის ზრდის ეტაპს მარტივად გაუმკლავდებით.

მთავარია, არ დაგვავიწყდეს, რომ SEO სრულყოფისკენ გადადგმული თითოეული ნაბიჯი კონკურენტებისთვის დამატებით ბარიერს წარმოადგენს.

რეკლამა 24/7

რთულია, აღმოაჩინო შესაძლებლობა, რომელიც მომხმარებლებთან დანახარჯების გარეშეც გამუდმებული კავშირის გარანტიას მოგცემს. მოწინავე პოზიციების მოპოვების შემთხვევაში დღის ნებისმიერ მონაკვეთში შეგიძლიათ გამოჩნდეთ მომხმარებლების ეკრანებზე.

ეფექტური SEO ოპტიმიზაციის წყალობით, თქვენს სამიზნე სიტყვებზე საძიებო შედეგებში გამოჩენას 24/7-ზე შეძლებთ.

გაყიდვების პროცესის გამარტივება

B2B გაყიდვების პროცესი ხშირად რამდენიმე ხანგრძლივი ფაზისგან შედგება, რომელიც ორივე მხარის (მყიდველი და გამყიდველი) დიდ დროსა და ფინანსურ  რესურსებს მოითხოვს: მომხმარებლის მოძიება, გასაუბრება, შეხვედრა, პრეზენტაციის წარდგენა და ა.შ. რაც უფრო რთული და ხანგრძლივია გაყიდვების ფაზა მით უფრო დაბალია პოტენციური მომხმარებლის ერთგულ მომხმარებლად გადაქცევის შანსი.

საძიებო სისტემა კი ზემოთ ხსენებულ პროცესებს ამარტივებს. გაყიდვების მენეჯერს გაცილებით ნაკლები ძალისხმევის გაწევა უწევს მომხმარებლის მოძიებისთვის, უკეთესად იცნობს მყიდველის განზრახვას და იღებს ხარისხიან ლიდს (პოტენციური მომხმარებლები, რომლებთაც აქვთ თქვენი პროდუქტის შეძენის რეალური საჭიროება და ინტერესი).

ფასიანი ქაღალდების ფასი

2022 წლის კვლევების თანახმად კარგად ოპტიმიზირებული ვებგვერდი და აქციის ფასი დადებით კორელაციაშია ერთმანეთთან. ბუნებრივია, ეს არ ნიშნავს კომპანიის ღირებულების გარანტირებულ ზრდას, მაგრამ ძალიან ეხმარება კორპორატიული იმიჯის ჩამოყალიბებაში. ამიტომ, თუ აქციების გამოშვებას დააპირებთ, ან ინვესტორის მოხიბვლას შეეცდებით, გაითვალისწინეთ, რომ პოტენციური აქციონერები თქვენი ბიზნესის შეფასებისას შესაძლოა SERP-ის ანალიზსაც იყენებდნენ.

რას ეძებს მომხმარებლის მხარე და როგორ უნდა უპასუხოს ბიზნესმა

B2B SEO ოპტიმიზაცია

დაინტერესებული მხარეების მენეჯერები B2B ორგანიზაციის მთავარ სამიზნეებს წარმოადგენენ, რადგან ძირითადად ისინი იღებენ საბოლოო გადაწყვეტილებას პროდუქტის შესყიდვის ან პარტნიორობის გაფორმების შესახებ. როგორ ზემოთ აღვნიშნეთ, მენეჯერები დროის სიმცირის გამო ინფორმაციის მიღების ეფექტურ მეთოდს, კონკრეტულად კი Google Search-ს მიმართავენ. ბუნებრივია, B2B გამყიდველებს კარგად უნდა ესმოდეთ მათი ქცევები საძიებო სისტემაში, რას, როდის და რატომ ეძებენ.

ინფორმაცია პარტნიორების შესახებ

დეპარტამენტის ხელმძღვანელებს ხშირად უწევთ სტრატეგიული პარტნიორების მოძიება. ამისათვის კი, მათ დეტალური ინფორმაცია სჭირდებათ პოტენციური პარტნიორების შესახებ. აქ არ იგულისხმება პროდუქტის შესყიდვა, არამედ ბიზნეს ურთიერთობებით სინერგიის ეფექტის შექმნა, მაგ: გაერთიანება, თანაინვესტირება და ა.შ. სავსებით ლოგიკურია, თუ გსურთ, რომ თქვენზე შეაჩერონ არჩევანი, მინიმუმ ინფორმირებული უნდა იყვნენ თქვენი კომპანიის შესახებ. ამას კი ვებგვერდის ოპტიმიზაციის დახმარებით მოახერხებთ.

როდის ეძებენ მსგავს ინფორმაციას? – როდესაც კომპანიები გაფართოებას, გაერთიენებული ძალებით ახალ ბაზრებზე გასვლას ან თუნდაც მომავალში სტრატეგიული ნაბიჯების გადადგმას აპირებენ.

მათ აინტერესებთ თქვენი შეთავაზებები, მენეჯმენტის დეტალური აღწერა, რათა შეაფასონ რამდენ სანდოა თქვენი ორგანიზაცია, რა მიღწევები გაქვთ ამ სფეროში, არსებობის რამდენად გრძელი ისტორია გაქვთ და ა.შ. ეს ინფორმაცია განთავსებული უნდა იყოს თქვენი ვებგვერდის სანავიგაციო პანელში.

მაგ: cloud მონიტორინგის B2B მომსახურების კომპანია Datadog მომხმარებლებს, ინვესტორებსა და ნებისმიერ დაინტერესებულ მხარეს დეტალურ ინფორმაციას აწვდის ორგანიზაციის შესახებ: პარტნიორები, მენეჯმენტი, კარიერა, სიახლეები, ანალიტიკური რეპორტები, ჯილდოები და ა.შ. ამით მათ ნებისმიერ კითხვაზე ამომწურავი პასუხით უზრუნველყოფს.

 

პროდუქტების დეტალური აღწერა

SEO ოპტიმიზაციის პროცესს ხელს უწყობა პროდუქტების დეტალური აღწერა

მომხმარებლის მხარეს აინტერესებს თქვენი პროდუქტის მახასიათებლები, უპირატესობები, ფასები და ა.შ. თქვენმა ვებგვერდმა უნდა აჩვენოს შესყიდვის მიზეზი, რატომ უნდა იყოს თქვენგან და არა კონკურენტისგან. შესაბამისად, კატეგორიების გვერდზე პროდუქტების დეტალური აღწერა ძალიან მნიშვნელოვანია.

დავუშვათ, პოტენციურმა მომხმარებელმა გუგლის საძიებო ველში ჩაწერა კონკრეტული პროდუქტი, მაგ: „სამშენებლო ტექნიკა“. პროდუქტის გვერდის მიზანი ამ შემთხვაში მომხმარებლის დეტალური ინფრომაციით უზრუნველყოფა იქნება. ვიზიტორმა იმდენად ამომწურავი ინფორმაცია უნდა მიიღოს პროდუქტების გვერდზე, რომ არ მოუნდეს ვებგვერდიდან გასვლა.

პროდუქტის შესახებ ინფორმაციის ძიება მომხმარებლის სერიოზულ განზრახვაზე მიუთითებს, რაც კონვერტაციის გაზრდილ შესაძლებლობას გულისხმობს. თუმცა მხოლოდ დეტლაური აღწერა პროდუქტის გვერდის ოპტიმიზაციისთვის არ არის საკმარისი. დამატებით, რა უნდა გავაკეთოთ იმისთვის, რომ მოწინავე პოზიციებზე გამოვჩნდეთ ამ კონკრეტულ საძიებო სიტყვაზე?

  • ვებგვერდის ტექნიკური გამართვა
  • საძიებო სიტყვების სწორად გამოყენება
  • პროდუქტის გვერდის კონტენტის SEO ოპტიმიზაცია
  • პროდუქტის დეტალური აღწერა
  • Schema markup-ის სწორი გამოყენება
  • გვერდის შიდა გადამაისამართებებით გაძლიერება

პროდუქტის გვერდების ოპტიმიზაცია სასიცოცხლოდ მნიშვნელვოვანია ბიზნესის გრძელვადიანი წარმატების მოსაპოვებლად.

ალტერნატივების შეფასება

დამკვირვებელი აფასებს რამდენად ღირებულია თქვენი პროდუქტი თუ მომსახურება. მაგრამ ვებგვერდზე შემოსვლისას, მას არა მხოლოდ პროდუქტის მახასაითებლები აინტერესებს, არამედ როგორ პასუხობს თქვენი პროდუქტი ინდუსტრიაში მიმდინარე ტენდენციებს, რა როლი უჭირავს ბაზარზე თქვენს ბიზნესს და ა.შ.

B2B შესყიდვების პროცესი B2C-სთან შედარებით გაცილებით რაციონალური პროცესია. შესყიდვების დეპარტამენტი მუდმივად გადარებთ კონკურენტებს. მუდმივად ცდილობს იპოვოს ხელჩასაჭიდი განსხვავება, რომლითაც შეძლებს არჩევანის გაკეთებას თქვენსა და კონკურენტს შორის. ერთი შეხედვით უმნიშვნელო დეტალი ხშირად გამხდარა გაყიდვების მცდელობის წარუმატებლად დასრულების მიზეზი. დავშვათ, თქვენ და კონკურენტი იდენტურ ხარისხის ალუმინს ყიდით. ამ დროს შესყიდვების დეპარტამენტი დაიწყებს თქვენს შორის კონკურენტული უპირატესობების დადგენას. ფასისა და ხარისხის თანაფარდობის გარდა, დაინტერესდება თუ რამდენად ორგანიზებული და მოწესრიგებულია პოტენციური პარტნიორი. ამ დროს, შედარების პროცესში მნიშვნელოვანი განსხვავებების დანახვის ძალინ კარგი საშუალება მოწესრიგებული და გამართული ვებგვერდია. ალუმინის მწარმოებლების პროდუქტი და ფასი ბაზარზე თითქმის იდენტურია, მაგრამ ყველა ერთნაირად სანდო არ არის. გამართული ვებგვერდი სანდოობის ერთ-ერთი ინდიკატორია.

 

ზემოთ ხსენებული პროცესების თანახმად, მარტივად შეძლებთ მომხმარებლის ძიების განზრახვის გამოცნობას. შემდეგ კი მასზე მორგებული B2B ვებგვერდის შექმნას, რომელიც საძიებო სისტემაში წამყვან პოზიციებს დაიკავებს.

B2B ციფრული წარმატების მოსაპოვებლად კი სპეციალიზირებული SEO სააგენტო სასიცოცხლოდ მნიშვნელოვანია.

 

სპარტაკ გაჩეჩილაძე
სპარტაკ გაჩეჩილაძე

სტატიის ავტორი

კომენტარის დატოვება

თქვენი ელფოსტის მისამართი არ გამოქვეყნდება.

მსგავსი სტატიები